بۇگىن حوححوتتا (قىتاي) دزيۋدودان الەمدىك گران پري كەزەڭى باستالدى. الەمنىڭ 46 ەلىنەن 361 دزيۋدوشى 7 سالماق دارجەسەنىدە باقتارىن سىناپ جاتىر. جارىستىڭ العاشقى كۇنىندە جەڭىل سالماقتاعى بالۋاندار, اتاپ ايتقاندا, ەرلەر -60 كگ, -66 كگ, ايەلدەر -48 كگ, – 52 كگ, -57 كگ سالماق دارەجەسىندە بەلدەستى. قازاقستان ۇلتتىق قۇراماسىنان 4 دزيۋدوشى تاتاميگە شىعىپ, ءۇش مەدال قورجىنعا سالدى, دەپ حابارلادى قازاقستان دزيۋدو فەدەراتسياسىنىڭ ءباسپاسوز قىزمەتى.
ەرلەر اراسىندا 60 كەلىگە دەيىنگى سالماقتا ەلدوس سمەتوۆ قارسىلاس شاق كەلترىمەي, جارىس جەڭىمپازى اتاندى. ول فينالدا تاعى ءبىر وتانداساىمىز عۇسمان قىرعىزباەۆتى يپپونمەن جەڭدى.
ەلدوس سمەتوۆ العاشقى بەلدەسۋىندە جاپوندىق يۋما وشيمانى قوسىمشا ۋاقىتتا (گولدەن سكور) ۆازاري ۇپايىمەن, ەكىنشى اينالىمدا رەسەيلىك روبەرت مشۆيدوبادزەنى ۋاقىتىنان بۇرىن تازا جەڭىپ, جارتىلاي فينالعا جولداما الدى. جارتىلاي فينالدا برازيليا دزيۋدوشىسى پەليم فەليپەنى يپپون ۇپايىمەن ۇتىپ, فينالعا شىققان بولاتىن.
ال عۇسمان قىرعىزباەۆ فينالعا دەيىن جەڭىلىسسىز 3 كەزدەسۋ وتكىزدى. ول العاشقى بەلدەسۋىندە سولتۇستىك كورەيالىق پاە دونگ جونگپەن كەزدەسىپ يپپونمەن جەڭسە, ەكىنشى بەلدەسۋىندە موڭعوليالىق گانباد بولدبااتاردى, جارتىلاي فينالدا امارتۋۆشين داشداۆاانى ۋاقىتىنان بۇرىن يپپون ۇپايىمەن جەڭىپ, شەشۋشى كەزەڭگە جولداما العان ەدى.
66 كەلىگە دەيىنگى سالماقتا تاتاميگە شىققان ەلدوس جۇماقانوۆ ەل قورجىنىنا ءبىر قولا مەدالىن سالدى. ول 5 كەزدەسۋ وتكىزىپ, تەك بىرەۋىندە, جارتىلاي فينالدىق جولداما ءۇشىن كۇرەستە گەرمانيالىق سەباستيان سەيدلگە ەسە جىبەردى. ال جۇبانىش فينالىندا ابدۋللا ابدۋجاليلوۆتى ۆازاري ۇپايىمەن جەڭىپ, قولا جۇلدەنى جەڭىپ الدى.
جارىستىڭ ءبىرىنشى كۇنگى قورىتىندىسى بويىنشا قازاقستان مەدال كەستەسىندە 1 التىن, 1 كۇمىس جانە 1 قولا مەدالمەن 2 ورىندا تۇر. الەمدىك گران پري كەزەڭى 27 مامىرعا دەيىن جالعاسادى. ايتا كەتەيىك, بۇگىن, 25 مامىر دزيۋدودان توكيودا وتەتىن جازعى وليمپيادا ويىندارىنا ليتسەنزيالىق ىرىكتەۋ كەزەڭى باستالدى. حوححوتتا ءوتىپ جاتقان گران پري ىرىكتەۋ كەزەڭىنىڭ العاشقى تۋرنيرى بولماق.